Wehi ʻŌlelo (kāmua)

No «hamani»

ao

[hamani] He akahele ʻana me ka nānā pono. Ke Kaʻao o Lāʻieikawai

• Laʻana palapala:
  • E ao ʻoe o ʻeha. Hawaiian Dictionary (Pukui & Elbert)
  • E ao naʻe ʻoe iā Kalahumoku. Fornander, V, 413

akahele

[hamani] He hana ʻana i kekahi mea me ka mālie, ka noʻonoʻo pono, a me ka makaʻala. He Moʻolelo Kaʻao no Kekūhaupiʻo

• Laʻana palapala:
  • E akahele ʻoe i kou hele ʻana i loko o laila, nui nā hopeʻō i kāpili i pūnana ma laila.

akena

[hamani] He kaena ʻana, ʻo ia hoʻi, he hoʻonuinui ʻana i ka ʻōlelo no ka maikaʻi o kekahi mea i mea e hōʻoio wale ai; he hōʻoio a he haʻakei ʻana paha. Puke Wehewehe Hou

aloha hoʻokaʻawale

[hamani] He aʻa ʻana aku i ke aloha i ka wā e haʻalele a kaʻawale ai kekahi i kekahi. He Moʻolelo Kaʻao no Kekūhaupiʻo

• Laʻana palapala:
  • A ua hāʻawi akula ʻo ia i ke aloha hoʻokaʻawale ma waena ona a me ke Aliʻi Kamehameha. He Moʻolelo Kaʻao no Kekūhaupiʻo

alu

[hamani] He komo nui ʻana o kekahi poʻe i kekahi hana no ka paio, hakakā, a hana like i mea e kō ai ia hana. Puke Wehewehe Hou

• Laʻana palapala:
  • ...e hālāwai ana ka ʻAhahui Hōʻole Wai ʻOna i ka pō o ka lā ʻāpōpō, i ka hola 7P ma Kawaiahaʻo. E hele mai kākou a pau a e alu like. Ka Nupepa Kuokoa, 30 Malaki 1865
  • A no kēia pilikia nō, e alu like mai nō kākou. E kū mai ʻoe e Kauaʻi o Manokalanipō, pēlā nō hoʻi ʻoe e Oʻahu o Kākuhihewa, e kāhea mai e kiʻi aku... Ka Nupepa Kuokoa, 15 Ianuali 1870

alualu

[hamani] Ka hahai aku i kekahi mea no ka hopu ʻana. He Moʻolelo Kaʻao no Kekūhaupiʻo

amo

[hamani] Ka ʻauamo ʻana i kekahi mea; ka hāpai ma ka hokua. Puke Wehewehe Hou

āmū

[hamani] He kahi a ʻako ʻana paha i ka lauoho a mea like paha. He Moʻolelo Kaʻao no Kekūhaupiʻo

• Laʻana palapala:
  • ʻO ko lākou mau lauoho, ua āmū ʻia a ʻano mahiole. He Moʻolelo Kaʻao no Kekūhaupiʻo

apo

[hamani] He hopu ʻana i kekahi mea me nā lima a puni ia mea. Puke Wehewehe Hou

• Laʻana palapala:
  • …i apo aʻe auaneʻi kāna hana i ua mea ʻulaʻula nei, hala ana kona lima. Ka Moʻolelo Hiwahiwa o Kawelo
  • Apo aʻela ʻo Kāʻala me kona mau lima palupalu ma ka ʻāʻī o kāna kāne. Lehua ʻĀhihi : Makakēhau…
  • E apo mai ʻoe iā Tūtū, e ka moʻopuna.

apu

[hamani] He nanahu ʻana i kekahi mea e like me ka hana a ka ʻīlio ke kiʻi ʻo ia i ka ʻāpana ʻiʻo pipi.

• Laʻana palapala:
  • ...ʻo ka waha ihola nō ia o ka ʻenemi, e apu ana i ʻō a i ʻaneʻi me he ʻīlio hae lā... Ka Nupepa Kuokoa, 23 ʻAukake 1862

awaiāulu

[hamani] He hoʻopaʻa pū ʻana i ʻelua a ʻoi mea a paʻa ka pilina; ka hana like ʻana.

• Laʻana palapala:
  • Awaiāulu ʻia kākou a lilo i hoʻokahi pana ʻana o ka puʻuwai. Ka Puke Moʻolelo o Hon. Iosepa K. Nāwahī
  • Awaiāulu ke aloha. ʻŌlelo Noʻeau, 245
  • Ua awaiāulu ʻia ke aloha pili paʻa i loko o ko lāua mau puʻuwai, kekahi me kekahi. He Moʻolelo Kaʻao no Kekūhaupiʻo

aʻa

[hamani] He heahea ʻana aku me ke aloha; he “hāʻawi” ʻana i ke aloha. Ka Moʻolelo o Lonoikamakahiki

• Laʻana palapala:
  • E aʻa mai ana ko ipo iā ʻoe, … Ka Moʻolelo o Lonoikamakahiki, ʻaoʻao 11

ō

[hamani] He pane ʻana o ke kanaka ke kāhea ʻia ʻo ia, ʻo ka maʻamau ma ka hoʻōho ʻana aku iā eō.

• Laʻana palapala:
  • Hea aku mākou, ō mai ʻoe. Ka Puke Moʻolelo o Hon. Iosepa K. Nāwahī
  • Mai poina ʻoukou i ke ō i ko ʻoukou mau inoa ke kāhea au i ka papa inoa.
  • ʻŌlelo maila ʻo Hiʻiaka iā Wahineʻōmaʻo, “ʻAuhea ʻoe, e aikāne?” Ō akula nō hoʻi ʻo Wahineʻōmaʻo me ka ʻōlelo ʻana aku, “Eia nō au. I ke aha lā?” Ka Moʻolelo o Hiʻiakaikapoliopele, ʻao 126

ona

[hamani] He hoʻohihi, liʻa, a makemake nui ʻana paha i kekahi mea. He ʻōlelo maʻamau o ke mele aloha. He Moʻolelo Kaʻao no Kekūhaupiʻo

• Laʻana palapala:
  • Eia mai au ʻo Mākālei, lāʻau ona mau ʻia e ka iʻa. Huaʻōlelo Makalei
  • Hiaʻai, hiaʻai i ka nani lā
    ʻO aʻu Lehua i Hōpoe lā
    Ke ona ʻia maila e ka ʻIwi lā
    E ka manu hulu weo o ʻŌlaʻa Ka Leo o ka Lahui, 6 ʻAukake 1894
  • ʻO ka inoa o kēia Leho a Keaʻau, ʻo Kalokuna. He ʻano like nō paha ke ona ʻia o kēia Leho e ka heʻe o Kaiuli, e like me ke ona ʻia o ka pā kua hūhū a Kaʻeha, ke keiki lawaiʻa hī aku o Kekaha wai ʻole o nā Kona. He Moʻolelo Kaʻao no ʻIwa, ʻao 1

uē paʻiāuma

[hamani] He ʻano uē ʻana me ka paʻi pū i ka umauma ma ke ʻano he kūmākena. ʻO ke ʻano uē maʻamau kēia o ke au kahiko ma ka hala ʻana o kekahi mea i aloha nui ʻia. Puke Wehewehe Hou

ui

[hamani] He nīnau ʻana.

uhae

[hamani] He nahae a kīhae ʻana paha i kekahi mea. Lehua ʻĀhihi : Makakēhau…

• Laʻana palapala:
  • Hele mai i mua oʻu a naʻu nō e uhae, mai ko puʻu mai, i ko alelo. Lehua ʻĀhihi : Makakēhau…

uhai

[hamani] He hahai a alualu ʻana paha i kekahi mea. Puke Wehewehe Hou

• Laʻana palapala:
  • I ka Poʻaono nei i hele ai ʻo Kauila i ka uhai puaʻa. Puke Wehewehe Hou

uhaki

[hamani] He haʻi, haki, a hoʻohaki nui ʻana paha a mokumoku. Mākālei Kona

• Laʻana palapala:
  • Ua piʻi ka huhū o ka poʻe ʻĪkālia i ka uhaki ʻia o ka nulu pakeki i kona uhao ʻia i ka wai wela.
• Pilina:
  • Like pū me: uhaʻi.

[hamani] He ʻaʻe ʻana i ke kānāwai a kapu paha. He Moʻolelo Kaʻao no Kekūhaupiʻo

• Laʻana palapala:
  • Mai laila aʻe, komo ma ka lumi ʻoihana o ka luna nui. ʻIke akula i nā puke o ka ʻoihana a me nā kūpeʻe hao no ka mea uhaki kānāwai. Ka Nupepa Kuokoa, 27 Iulai 1876
  • ʻO ka mea nāna e uhaki i ke kapu, e hoʻopaʻi ʻia ʻo ia ma ka uku hoʻopaʻi, ʻaʻole ʻoi aku i nā kālā he ʻumikumamālima a me ka waiwai i loko o ka iʻa āna i lawaiʻa ai. Ka Nupepa Kuokoa, 7 Kepakemapa 1859