Wehi ʻŌlelo (kāmua)

No «hōʻike honua»

awa

[kikino] He wahi lulu e hoʻokomo ai ka waʻa a moku paha i ka ʻāina; he kai kūʻono. Puke Wehewehe Hou

• Laʻana palapala:
  • He makani ʻino o Hilo i hiki ʻole ai i nā moku ke komo i ke awa o Hilo ma muli o kona hao ikaika ʻana mai.
  • He wahi kauhale liʻiliʻi ʻo Honolulu i ka wā kahiko a lilo aʻela i kūlanakauhale nui ma muli o kona awa kū moku i ka hiki ʻana mai o nā moku haole.
  • Mai koʻu hale aku, ahuwale ke awa kū moku o Hilo.
  • No ka weluwelu o ko mākou mau kia a me nā peʻa i ka ʻino, ua pono e kū i ke awa no ka hoʻoponopono ʻia o ia mau mea.
  • Nui nā awa liʻiliʻi o nā kapa kai o kēia mau mokupuni. Moʻolelo Hawaiʻi o Kalapana
• Pilina:
  • E nānā pū iā awa kū moku, awa pae.

Lepe Kumuhana: hōʻike honua

moʻo ʻāina

[kikino] He ʻāpana ʻāina ʻololī liʻiliʻi i emi kona nui ma lalo o ka ʻili ʻāina.

• Laʻana palapala:
  • ʻAʻohe wahi kūpono i koe i ka mahi ʻai, ua pau nō nā kīhāpai a me nā moʻo ʻāina i ka mahi ʻia e nā kamaʻāina. Huaʻōlelo Makalei

Lepe Kumuhana: hōʻike honua

pae moku

[kikino] He pae ʻāina, he mau mokupuni e waiho pū ana. He Moʻolelo Kaʻao no Kekūhaupiʻo

• Laʻana palapala:
  • A i kekahi lā aʻe, hele lākou nei i ka mākaʻikaʻi i nā paemoku o ke kamaʻāina Taetaeti. A hiki lākou nei ma ke awa ʻo Taiohaʻe ma ka moku ʻo Nukuhiwa, he mahalo wale nō kā nā malihini no ka maikaʻi o ia pae moku. Kaʻehuikimanōopuʻuloa, 5:33
  • ʻO ka ʻāina ka pae moku ʻo Polapola. Aia ia pae moku i ka ʻaoʻao hema o ka Pākīpika. Moʻolelo Polenesia, ʻaoʻao 57
  • ʻO ko Hawaiʻi pae ʻāina kekahi o nā pae moku lōʻihi loa o ke ao ke ana ʻia a hiki i kona huelo ʻo Kure. He Moʻolelo Kaʻao no Kekūhaupiʻo
• Pilina:
  • Like pū me: pae ʻāina.

Lepe Kumuhana: huli honua hōʻike honua

pae ʻāina

[kikino] He pae moku, he mau mokupuni e waiho pū ana. He Moʻolelo Kaʻao no Kekūhaupiʻo

• Laʻana palapala:
  • Aia he hana nui ma ka ʻaoʻao o kēia Nāpōliona o ka Pākīpika no ka waele ʻana i ke alanui no ka hana a ke akua ma ia hope mai, a i lilo hoʻi kona ola ma hope mai i mea hoʻohui i kēia pae ʻāina. He Moʻolelo Kaʻao no Kekūhaupiʻo, 20:80
  • Eia mai kahi kolamu hou i kākau ʻia ma ka ʻōlelo kanaka, ka ʻōlelo ʻōiwi hoʻi o nēia pae ʻāina, a e hōʻike ana nō hoʻi i nā manaʻo like ʻole a ma nā ʻano like ʻole hoʻi no ka nīnau nui a me ka nīnau iki o ke ao nei. Kauakūkalahale, 2002-10-27-1
  • Ua noho ua poʻe malihini nei ma Nuʻumealani a hala nā lā ʻelima, mākaukau ko lākou nei hoʻi mai laila mai a hiki hou lākou nei i ko Tahiti pae ʻāina. Kaʻehuikimanōopuʻuloa, 5:34
• Pilina:
  • Like pū me: pae moku.

Lepe Kumuhana: huli honua hōʻike honua