Wehi ʻŌlelo (kāmua)

No «ʻaʻano»

maea

[ʻaʻano] He pilo o ka hou o ke kino, ka mimi, ka luaʻi, a me ke kūkae. Moʻolelo Hawaiʻi o Kalapana

• Laʻana palapala:
  • “ʻŪ! Hauna ʻino maoli hoʻi kēia mea, hohono ʻino a maea kā hoʻi,” a piha loa ihola nā akua i ka hoʻonāukiuki. Ke Kaʻao no Kamiki, 12:10, ʻaoʻao 42
  • Ma kahi maea ma laila ka nalo e wā ai. ʻŌlelo Noʻeau, 2089
  • Maea nā kino o lākou i ka ʻauʻau ʻole. Moʻolelo Hawaiʻi o Kalapana

malū

[ʻaʻano] He ʻano huna o ka lawelawe ʻana i kekahi hana i ʻole e ʻike ʻia. Mākālei Kona

• Laʻana palapala:
  • ʻAi malū ʻia ke koena kūlolo e nā kamaliʻi.
  • E hālāwai malū kākou no ka hoʻolālā ʻana i ka pāʻina hoʻopūʻiwa. Moku ka Pawa
  • ʻOiai i hōʻole ʻia ai ka ʻai kanakē e ka māmā, ua ʻai malū ke keiki. Moku ka Pawa
  • Ua komo malū ʻo ia i loko o ka pā kula.

mālualua

[ʻaʻano] He wahi e like me ke ala nui i ʻāpuʻupuʻu a piha paha i nā lua liʻiliʻi.

• Laʻana palapala:
  • Ua haʻalele ʻia kēlā wahi no ke ʻā mālualua, ʻāpoʻopoʻo, ʻāpūʻiliʻili nō hoʻi, a pēlā aku. Huaʻōlelo Makalei

mōkākī

[ʻaʻano] He waiho kāpulu ʻana o kekahi mea ma ʻō a ma ʻaneʻi. Mākālei Kona

• Laʻana palapala:
  • E mōkākī ana nā niu ma lalo o ka ulu niu. Mōkākī nō hoʻi nā lole o Kai mai ʻō a ʻō o kona lumi moe. He Moʻolelo Kaʻao no Kekūhaupiʻo

palakū

[ʻaʻano] He palahū; he pala loa o ka hua ʻai a ma ʻō aku o ka pala pono. Mākālei Kona

• Laʻana palapala:
  • Ua palakū ka hua ʻōhiʻa ʻai.

Lepe Kumuhana: mahi ʻai mea ʻai

pāwehi

[ʻaʻano] He hoʻonaninani ʻia ʻana o kekahi mea i nā mea nani. Puke Wehewehe Hou

• Laʻana palapala:
  • ʻO ka pāwehi mua loa ʻana ia o Iosepa Nāwahī i ka lei hanohano. Ka Puke Moʻolelo o Hon. Iosepa K. Nāwahī

paʻē

[ʻaʻano] He pā ʻana o ka pepeiao i ke kani no kahi mamao mai.

• Laʻana palapala:
  • Paʻē ka leo o nā kini o Kumukahi. Ka Puke Moʻolelo o Hon. Iosepa K. Nāwahī

Lepe Kumuhana: mele/oli-KS

pī

[ʻaʻano] He ʻano ʻauʻa o ke kanaka; ʻaʻole e kaʻana aku i kona mau waiwai. Puke Wehewehe Hou

• Laʻana palapala:
  • Ma muli o kona ʻano he pī, ʻaʻohe keiki e noi ana iā ia i kanakē. Moku ka Pawa

Lepe Kumuhana: lawena kanaka

pīkananā

[ʻaʻano] He lokoʻino a mākonā paha ma ke ʻano naʻau pōkole. Mākālei Kona

• Laʻana palapala:
  • ...pane maila me ka pīkananā, “He aha mai nei lā kēia wahi keiki maʻi lewalewa o ka miki ʻana maila a paʻa ana i ka manu o ka waʻa; hele ma kahi ʻē! ʻAʻole ʻo ʻoe kā mākou e nānā aku ai, e kēia wahi pokeʻo iki a heha.” Huaʻōlelo Makalei

Lepe Kumuhana: haʻawina naʻau lawena kanaka

puehu

[ʻaʻano] Ka lū ʻia ʻana o kekahi mea ma ʻō a ma ʻaneʻi e like me ka pepa, hulu manu, a mea māmā like ʻē aʻe paha paha i lilo i ka makani; ka haʻalele ʻana o kānaka i kekahi wahi.

• Laʻana palapala:
  • Ua hoʻoʻauheʻe ʻia nā kipi a puehu wale aku nō lākou me ka hoʻi hou ʻole mai. Ka Nupepa Kuokoa, 1 ʻOkakopa 1861
  • Ua puehu ka hulu o ka manu (he ʻōlelo no ke kanaka i haʻalele me ka pupuāhulu). Hawaiian Dictionary: Hawaiian-English English-Hawaiian Revised and Enlarged Edition
  • E puehu aku ana ia hauʻoli. Lehua ʻĀhihi : Makakēhau…
  • He puehu aku nō hoʻi koe o kāu mau pepa ke ʻole ʻoe e paʻa pono aku; ikaika ka makani o kēia holoē.

ʻāpona

[ʻaʻano] Ka ʻapo ʻia ʻana. Ke Kaʻao no Kamiki

• Laʻana palapala:
  • …ʻōlapa maila ʻo Kauilanuimākēhāikalani i ke ʻāpona o Lanipipili a me Lanihākoʻi… Ke Kaʻao no Kamiki, mok.XII, ʻaoʻao 46:16
  • Ua hiamoe maikaʻi ihola ko kākou koa i loko o nā ʻāpona hihiʻo o ka ʻāina moeʻuhane. He Moʻolelo no ʻIvanahō, ʻaoʻao 240
• Pilina:
  • Huaʻōlelo pili: ʻapo #1.

ʻehu

[ʻaʻano] He ʻano hāʻulaʻula a hāmelemele paha o ka lauoho a ʻili o kekahi poʻe Hawaiʻi. He Moʻolelo Kaʻao no Kekūhaupiʻo

• Laʻana palapala:
  • ʻO kona lauoho piʻipiʻi e luhe ana a hiki i kona pūhaka, e hulali ana me he gula lā, ʻoiai he lauoho ʻehu kona. Ka Nu Hou Hawaii, 3 Malaki 1874

ʻī

[ʻaʻano] Ka ʻoi loa o nā mea a pau.